Pétition publique n°4177

Pétitionnaire : Kevin Krier

Mir fuerderen, datt all Persoun, déi zu Lëtzebuerg Chômage, REVIS oder eng aner laangfristeg staatlech Sozialleeschtung kritt an déi kierperlech a geeschteg fäeg ass ze schaffen, verflicht gëtt, duerch eng nëtzlech Aktivitéit e Bäitrag fir d'Gesellschaft ze leeschten.

Begrënnung D'Sozialhëllef ass e wichtegt Sécherheetsnetz fir Mënschen, déi a Schwieregkeete sinn. Gläichzäiteg si mir der Meenung, datt all Persoun, déi fäeg ass ze schaffen, och eng Verantwortung vis-à-vis vun der Gesellschaft huet. Dofir schloe mir vir, datt Persounen, déi laangfristeg staatlech Ënnerstëtzung kréien, e puer Stonnen den Dag oder an der Woch eng Aufgab am Déngscht vun der Allgemengheet iwwerhuelen. Dat kéint zum Beispill sinn: Botz vun ëffentleche Plazen. Ënnerhalt vu Parken a Gréngflächen. Hëllef bei Gemengenaarbechten. Ënnerstëtzung vu Veräiner oder sozialen Organisatiounen. Matwierken un Ëmwelt- a Gemeinschaftsprojeten. Dës Aktivitéite sollen un d'Gesondheet, d'Fäegkeeten an d'perséinlech Situatioun vun de Betraffenen ugepasst ginn. Persounen, déi aus medezinesche Grënn oder wéinst enger Behënnerung net kënne matmaachen, sollen dovun ausgeholl ginn. Mir sinn der Meenung, datt dëse System: d'Verantwortungsgefill stäerkt, d'sozial Integratioun verbessert, den Alldagsrhythmus erhält, de Gemengen hëlleft, an e faire Gläichgewiicht tëscht Rechter a Flichte schaaft. Mir fuerderen d'Regierung an d'Chamber vun den Deputéierten op, e Gesetz auszeschaffen, dat esou eng Verpflichtung op eng gerecht, transparent a mënschewierdeg Aart a Weis aféiert.