Öffentliche Petition Nr.4131

Petent: Dale Oswald

Diese Petition ist in weiteren Sprachen verfügbar:

D'Haaptzil vun dëser Petitioun ass et, d'ëffentlech Sécherheet an d'Sécherheetsgefill vun de Biergerinnen a Bierger am ëffentleche Raum ze stäerken. Dofir fuerderen mir eng méi konsequent Uwendung an Duerchsetzung vun de bestehende Gesetzer géint de Besëtz, de Konsum an den Handel mat haarden Drogen ausserhalb vun de gesetzlech virgesinnenen a kontrolléierte Strukturen, souwéi méi ofschreckend Sanktioune fir déi betreffend Verstéiss. Gläichzäiteg ënnerstëtzt d'Petitioun de Weiderbestand vun de spezialiséierten Hëllefs- a Betreiungsstrukture fir drogenofhängeg Persounen.

An de leschte Jore gouf a verschiddene Géigende vum Land eng zouhuelend Präsenz vu Persounen observéiert, déi haart Drogen am ëffentleche Raum konsuméieren oder mat sech droen. Dës Substanze stellen eng Gefor fir d'ëffentlech Sécherheet. D' Persounen, déi ënner dem Afloss vun esou Substanze stinn, sin onberechenbar. Zousätzlech ginn dacks benotzten Drogenutensilien an Sprëtzen zereck geloos, net nëmmen op ëffentleche Plazen, mee och an ënnerierdesche Parkingen, an den allgemenge Beräicher vu Wunnresidenzen an op anere Plazen, déi vu ville Leit benotzt ginn (Parken, Spillplatzen). Dëst stellt e seriéise Gesondheets- a Sécherheetsrisiko duer, besonnesch fir Kanner, Awunner, Botzpersonal an aner Persounen, déi sech un esou Sprëtze verletze kënnen. Dofir fuerdere mir: • eng konsequent Kontroll an Uwendung vun de bestehende Gesetzer géint de Besëtz an de Konsum vun haarden Drogen ausserhalb vun den autoriséierte Strukturen; • d'Aféierung vun enger Mindestprisongsstrof vun 1 Joer fir Verstéiss am Zesummenhang mam Besëtz, Konsum oder Handel mat haarden Drogen ausserhalb vun de gesetzlech virgesinnenen a kontrolléierte Strukturen; • d'Méiglechkeet vu Prisongsstrofe vu bis zu 10 Joer a besonnesch schwéieren oder widderhuelte Fäll; Mir erkennen un, datt et zu Lëtzebuerg speziell Ariichtunge gëtt, an deenen drogenofhängeg Persounen Hëllef, medezinesch Betreiung, proppert Injektiounsmaterial an Ënnerstëtzung beim Ausstig aus der Sucht kréien. Dës Hëllefsstrukture spillen eng wichteg Roll fir d'Gesondheet an d'Sécherheet vun de Betraffenen an der Allgemengheet ze schützen a solle weiderhi bestoe bleiwen. D'Fuerderunge vun dëser Petitioun bezéie sech net op dës Ariichtungen, mee op de Besëtz an de Konsum vun haarden Drogen ausserhalb vun de gesetzlech virgesinnenen a kontrolléierte Strukturen.