Öffentliche Petition Nr.4108

Petent: Celestino Fecchi

Diese Petition ist in weiteren Sprachen verfügbar:

Dës Petitioun fuerdert d'Aféierung vun engem wéchentleche Cours fir Deeskalatioun a Konfliktléisung an de Primärschoulen a Lycéeën zu Lëtzebuerg. D'Zil ass et, de Kanner a Jugendlechen ze léieren, hir Emotiounen besser ze geréieren, Konflikter ouni Gewalt ze léisen, respektvoll ze kommunizéieren an Empathie, Nolauschteren a gutt Zesummeliewen ze stäerken. Wéinst der zouhuelender Gewalt, dem Mobbing an dem Manktem u Respekt an de Schoulen, soll dës Initiativ preventiv wierken an zu engem méi rouegen a respektvolle Schoulklima bäidroen am Interessi vun de Schüler, den Enseignanten an der ganzer Gesellschaft.

An de leschte Jore gëtt et och zu Lëtzebuerg ëmmer méi Fäll vu Gewalt, Mobbing, Beleidegungen, Provokatiounen a Respektmanktem an de Schoulen. Enseignanten, Educateuren, Elteren a virun allem d'Kanner selwer leiden ëmmer méi ënnert engem Klima vu Spannungen, psychologeschem Drock an aggressivem Verhalen. Vill Kanner a Jugendlecher hunn haut Schwieregkeeten, mat Frustratioun, Roserei, Konflikter oder Provokatiounen ëmzegoen. Amplaz ze schwätzen oder no Léisungen ze sichen, reagéieren ëmmer méi Jonker mat Aggressivitéit, Beleidegungen oder Gewalt. Dëst huet negativ Konsequenze fir d'Léierklima, d'Wuelbefanne vun de Schüler an d'Aarbechtskonditioune vum Schoulpersonal. An der Schoul léieren d'Kanner Mathematik, Sproochen a Wëssenschaften mee et gëtt kaum systematesch enseignéiert, wéi een respektvoll kommunizéiert, Konflikter léist, Emotioune kontrolléiert oder mat Stress a sozialem Drock ëmgeet. Dobäi sinn dat Fäegkeeten, déi am Alldag an am spéidere Liewen immens wichteg sinn. E wéchentleche Cours ab Primärschoul bis um een vom Lycée fir Deeskalatioun a Konfliktléisung kéint de Kanner a Jugendlechen hëllefen: besser mat Konflikter ëmzegoen, Gewalt ze vermeiden, Respekt an Empathie z'entwéckelen, besser nozelauschteren, sech selwer a seng Emotiounen besser ze kontrolléieren, an e bessert Zesummeliewen an der Schoul a Gesellschaft opzebauen. Esou eng Initiativ wier net nëmmen eng Hëllef fir d'Schoulen, mee eng laangfristeg Investitioun an d'Zukunft vun eiser Gesellschaft. Wa Kanner scho fréi léieren, Konflikter mat Respekt amplaz vu Gewalt ze léisen, kann dat zu méi Sécherheet, méi Zesummenhalt an engem bessere gesellschaftleche Klima bäidroen. Dës Petitioun setzt sech dofir an, datt sozial Kompetenzen, Respekt an Deeskalatioun dee selwechte Stellenwäert kréien ewéi aner wichteg Schoulfächer.