Ëffentlech Petitioun Nr.4187

Petitionär: Lise Amandine Deltour

Dës Petitioun ass an anere Sproochen disponibel

Plazen, déi vu Kanner dacks besicht ginn - wéi Sportszentren, Kinoen, Schwämmen, Fräizäitparken oder Bowlingzentren - sollten d'Gesondheet an d'Wuelbefanne vun de Kanner fërderen. Trotzdem sinn déi am meeschte siichtbar a promouvéiert Produkter dacks Softdrinks, Séissegkeeten an héich veraarbechte Liewensmëttel. Dës permanent Belaaschtung mécht et den Elteren méi schwéier, gesond Choixen ze fërderen, a dréit dozou bäi, datt de Konsum vu Produkter, deenen hir negativ Auswierkungen op d'Gesondheet gutt dokumentéiert sinn, als normal ugesi gëtt. Mat dëser Petitioun fuerdere mir d'ëffentlech Autoritéiten op, Mesuren anzeféieren, fir d'Promotioun an d'Visibilitéit vun héich veraarbechte Liewensmëttel a gezockerte Gedrénks op Plazen, déi haaptsächlech vu Kanner besicht ginn, ze limitéieren, an gläichzäiteg eng méi gesond, siichtbar an zougänglech Offer ze fërderen. Eis Kanner verdéngen en Ëmfeld, dat mat den Ziler vun der Präventioun an der ëffentlecher Gesondheet am Aklang steet.

D'Liewensmëttelëmfeld huet e groussen Afloss op d'Iessgewunnechten, besonnesch bei Kanner. Op Plaze fir Sport, Fräizäit a Kultur ginn gezockert Gedrénks an héich veraarbecht Liewensmëttel dacks besonnesch siichtbar presentéiert a staark promouvéiert. Dës widderhuelend Belaaschtung steet am Widdersproch zu de Recommandatioune vun der ëffentlecher Gesondheet, déi d'Zil hunn Iwwergewiicht, Diabetis, Häerz-Kreeslaf-Erkrankungen an aner chronesch Krankheeten ze verhënneren. E Gesondheet-fërderlecht Ëmfeld ze schafen ass eng unerkannt Moossnam an der Präventioun. D'Promotioun an d'Visibilitéit vun dëse Produkter op Plazen, déi haaptsächlech vu Kanner besicht ginn, ze reduzéieren, géif d'Familljen ënnerstëtzen, méi gesond Entscheedunge vereinfachen an dës Plaze besser mat hirer edukativer, sportlecher a kultureller Roll an Aklang bréngen.