Ëffentlech Petitioun Nr.4047

Petitionär: Kim Meyer

Dës Petitioun ass an anere Sproochen disponibel

Dës Petitioun fuerdert, datt Lëtzebuerg an Zäite vun enger internationaler Ueleg-, Energie- oder Versuergungskris d'Akzisen op Bensin an Diesel nëmme fir Residenten oder fir Gefierer mat lëtzebuergescher Immatrikulatioun reduzéiert. Persounen mat Wunnsëtz zu Lëtzebuerg a Gefierer mat lëtzebuergesche Placke sollen an esou Situatiounen e reduzéierte Präis bezuelen, deen duerch eng méi niddreg Besteierung erméiglecht gëtt. Auslännesch Gefierer an Tanktouristen sollen de normale Präis an déi normal Besteierung bäibehalen. D'Zil ass et, d'Residenten ze entlaaschten, ouni datt de Staat de Kraftstoffpräis direkt subventionéiert oder ëffentlech Gelder fir den Tanktourismus agesat ginn. D'Regierung soll d'Méiglechkeet kréien, temporär: d'Akzisen op Bensin an Diesel fir Residenten ze reduzéieren; den normale Steiersaz fir Net-Residenten an auslännesch Gefierer bäizebehalen; d'Kontroll iwwer d'Immatrikulatioun oder de Wunnsëtz virzegesinn; dës Moossnam automatesch a Kraaft trieden ze loossen, wann eng offiziell Energiekris deklaréiert gëtt oder wann de Präis vum Pëtrol eng festgeluechte Grenz iwwerschreit.

Lëtzebuerg ass ee vun deene Länner an Europa, wou vill Tanktourismus besteet. Wann de Staat an enger Kris d'Akzisen reduzéiert oder aner Hëllefe fir de Kraftstoffpräis aféiert, profitéieren net nëmme Residenten, mee och eng grouss Zuel vu Persounen aus den Nopeschlänner. Doduerch ginn ëffentlech Gelder agesat, ouni datt déi lëtzebuergesch Stéit an déi Persounen, déi zu Lëtzebuerg wunnen an hei op den Auto ugewise sinn, wierklech prioritär entlaascht ginn. An enger Uelegkris oder bei staark klammende Präisser soll de Staat fir d'éischt déi eege Residenten schützen. Vill Persounen zu Lëtzebuerg sinn op hiren Auto ugewisen, besonnesch ausserhalb vun de Stied an a Géigenden, wou den ëffentlechen Transport net genuch Alternativen ubitt. Den ungareesche Modell huet gewisen, datt et méiglech ass, e Präisdeckel exklusiv fir Gefierer mat nationaler Immatrikulatioun anzeféieren. E vergläichbart System kéint och zu Lëtzebuerg ëmgesat ginn, andeems d'Tankstellen d'Immatrikulatioun oder e Wunnsëtzsnachweis kontrolléieren. Dës Petitioun verlaangt keng permanent Ännerung, mee eng temporär an aussergewéinlech Moossnam, déi nëmmen an Krisenzäiten oder bei aussergewéinlech héije Präisser géif gëllen. En einfache Präisdeckel fir all Konsumenten ass keng gutt Léisung, well de Staat doduerch de Präis fir jiddereen ënnerstëtzt, och fir Tanktouristen an Net-Residenten. Dat géif um Enn duerch d'Steierzueler finanzéiert ginn, ouni datt de Lëtzebuerger Resident wierklech prioritär entlaascht gëtt. Amplaz dovun sollen d'Akzisen op Bensin an Diesel gezielt reduzéiert ginn, awer exklusiv fir Persounen mat Wunnsëtz zu Lëtzebuerg oder fir Gefierer mat lëtzebuergescher Immatrikulatioun. Net-Residenten an auslännesch Gefierer sollen déi normal Besteierung weider bezuelen. Op dës Aart a Weis kéint Lëtzebuerg seng eege Residenten entlaaschten an dobäi gläichzäiteg d'Recetten aus dem Tanktourismus fir d'Staatskeess bäibehalen. Gläichzäiteg géif esou eng Regelung dozou bäidroen, datt déi strategesch Kraftstoffreserven zu Lëtzebuerg besser geschützt ginn. Wann Tanktouristen net vum reduzéierte Präis profitéieren, gëtt et manner zousätzlech Demande aus den Nopeschlänner an d'Reserven an d'Versuergung kënnen éischter fir d'Residenten an déi lëtzebuergesch Wirtschaft erhale bleiwen.