Ëffentlech Petitioun Nr.4004

Petitionär: David Delvaux

Dës Petitioun ass an anere Sproochen disponibel

D'Lëtzebuergescht ass en zentrale Bestanddeel vun eiser nationaler Identitéit an eisem gesellschaftlechen Zesummeliewen. Laut Artikel 4 vun der Verfassung vum Grand-Duché ass Lëtzebuergesch d'national Sprooch vum Land. Am Alldag gesäit een awer ëmmer méi Situatiounen, wou d'Kommunikatioun op Lëtzebuergesch schwéier oder onméiglech gëtt. Dat betrëfft net nëmmen den ëffentleche Secteur, mee och vill Beräicher vum deegleche Liewen. Besonnesch a sensibele Situatiounen ass et wichteg, datt Leit sech an hirer eegener Sprooch kënnen ausdrécken an och verstan ginn. Dat gëllt zum Beispill bei: • Klinicken a Gesondheetsleeschtungen • Alters- a Fleegesecteuren • Schoulen a Betreiungsstrukturen • Apdikten • Geschäfter a Servicer • ëffentlech Administratiounen • a vill aner Beräicher

Vill Bierger, besonnesch eeler Leit oder Kanner, hunn net ëmmer d'Méiglechkeet op aner Sproochen zeréckzegräifen. Eng gemeinsam Sprooch am Alldag vereinfacht d'Kommunikatioun, vermeit Mëssverständnesser a stäerkt de sozialen Zesummenhalt. Dofir freet dës Petitioun d'Regierung an d'Chamber vun den Deputéierten: 1. D'Lëtzebuergescht als verpflichtend ze féierend Integratiounssprooch fir Leit ze stäerken, déi laangfristeg zu Lëtzebuerg liewen oder schaffen. 2. D'Méiglechkeete fir Lëtzebuergesch Coursen ze erweideren an se méi accessibel ze maachen. 3. Patronen ze encouragéieren oder dozou ze verflichten, hire Mataarbechter d'Méiglechkeet ze ginn, Lëtzebuergesch ze léieren. 4. D'Léiere vun der Lëtzebuergescher Sprooch als Standard an de Schoule fir Kanner a Jugendlecher anzeféieren. D'Zil ass net Leit auszeschléissen, mee d'Integratioun ze stäerken an ze garantéieren, datt d'Lëtzebuergescht als national Sprooch och am Alldag, am Commerce an am Kontakt mat der Bevëlkerung erhale bleift.