Fir eng Unerkennung vu Familljen an der Besteierung!

Ëffentlech Petitioun Nr.3899

Petitionär: Aline Schaltz

Dës Petitioun ass an anere Sproochen disponibel

Gemeinsam Besteierung net ofschafen, mee nei denken - d'Reform brauch Wielfräiheet & Diversitéit

D'Regierung schaaft d'Famill an der Besteierung of! Ab 2028 soll d'gemeinsam Besteierung (Steierklass 2) ewechfalen, esou datt et an Zukunft just nach Individualbesteierung gëtt. Zwar ass eng Iwwergangszäit vun 25 Joer virgesinn, fir datt Famillje kuerzfristeg net finanziell verléieren - mee d'Signal ass kloer: D'Famill gëtt net méi als wirtschaftlech Eenheet ugesinn. All Mënsch soll eenzel besteiert ginn - och wa Verantwortung, Akommes a Care-Aarbecht bewosst gedeelt ginn. Mir setzen eis dofir an, datt d'gemeinsam Besteierung net ofgeschaaft, mee moderniséiert a weiderentwéckelt gëtt - ugepasst un d'Liewensrealitéite vun haut. Reform - jo, mee eng Reform, déi Wielfräiheet ausbaut amplaz ze beschränken. Famillje sinn haut divers: zwee Vollzäitverdénger, Deelzäitmodeller, Caring-Partner*innen, Patchwork, Elengerzéiend. Net jidderee wëll eng Famill - an et ass och kee Muss. Awer wien eng grënnt, schaaft Wuerzelen, déi net nëmmen dat eegent Liewen droen, mee och dat vun eiser Gemeinschaft: Kanner droen d'Rentesystem, Partnerschaften entlaaschte Staat a Sozialstrukturen, Famillje fänken op, wat soss de Staat misst leeschten. Eng eenzel Persoun benotzt hiert Akommes fir sech eleng. An enger Famill awer muss d'Akommes méi Leit droen an erméiglecht esou Kannerbetreiung, Fleeg, Benevolat an aner gesellschaftlech wäertvoll Aufgaben, di sëlwer keen Akommes generéieren. E Steiersystem muss dës verschidde Liewensrealitéiten unerkennen: Akommes fir d'éischt deelen - duerno besteieren. E System, dat nëmmen d'Individuum gesäit, ënnerbannt Fräiheet amplaz se ze schafen - a schwächt den Zesummenhalt. Mir lancéieren dës Petitioun - fir eng Gesellschaft, déi Gemeinschaft net opléist mee unerkennt - fir e Steiersystem, dat Kanner, Partnerschaft, Care-Aarbecht a Benevolat sichtbar mécht a valoriséiert - fir eng Wielfräiheet zu gemeinsamer Besteierung amplaz Zwang zur Individualbesteierung - fir Diversitéit amplaz Eenheetsmodell - fir Zesummenhalt amplaz Individualiséierung - fir Gemeinschaft amplaz Trennung