Wat ass eng Petitioun?

Eng Petitioun ass en Uleies, dat un d’Chamber geriicht ass. All Persoun, déi am Nationale Regëster vu physesche Persounen (RNPP) erfaasst ass an op d'mannst 15 Joer huet, kann eng Petitioun areechen. Et gëtt zwou Zorte vun Petitiounen: déi ëffentlech Petitiounen an déi einfach Petitiounen.

Ëffentlech Petitioun

Fir Petitionär ze sinn, musst Dir:

  • op d’mannst 15 Joer al sinn;
  • eng Lëtzebuerger Matricule hunn (CNS-Nummer).

Dir braucht en Accès op den eAccess, fir Är Petitioun kënnen elektronesch anzereechen.

eAccess
LuxTrust

Sech iwwer e LuxTrust Produkt (Kaart, Signing Stick) oder eng eID-Kaart verbannen

GouvID

Iwwer e mobillen Apparat an iwwer d’App GouvID verbannen

eIDAS

Mat der digitaler Identitéit vun engem aneren europäesche Land verbannen

Wann Dir keen Outil hutt, fir den eAccess ze benotzen, kënnt Dir Äre Formulaire mat enger beglaubegter Ënnerschrëft per Post schécken oder perséinlech an der Chamber ofginn. Fir dëst ze maachen, musst Dir Är Identitéitskaart matbréngen an tëscht 9.00 an 17.00 Auer vu Méindes bis Freides an der Receptioun vun der Chamber (ausser Feierdeeg) passéieren. Ausserhalb vun dësen Stonnen ass et néideg, e Rendezvous ze fixéieren.

Wat sinn d’Etappe vun enger ëffentlecher Petitioun?

Eng ëffentlech Petitioun areechen

Dir kënnt eng ëffentlech Petitioun op dësem Site oder iwwer e Formulaire areechen.

D’Decisioun, ob d’Petitioun recevabel ass, ofwaarden

D’Petitiounskommissioun iwwerpréift, ob Är Petitioun all d'Krittären erfëllt.

Ënnerschrëfte sammelen

Zil ass et, op d'mannst 5500 Ënnerschrëften an 42 Deeg zesummenzekréien.

Är Petitioun an engem ëffentlechen Debat vertrieden.

Wann Är Petitioun de Sockel vun 5500 Ënnerschrëften erreecht huet, gëtt se an engem ëffentlechen Debat diskutéiert. Dir gitt invitéiert, Äert Uleies virun den Deputéierten an den zoustännege Ministeren ze vertrieden. Den ëffentlechen Debat gëtt online iwwerdroen.

Eng ëffentlech Petitioun areechen