Ufro fir temporär Suspendéierung oder Zoumaache vun der russescher Ambassade zu Lëtzebuerg

Einfach Petitioun Nr.3862

Petitionär: Romain Reiter

Här Präsident Mat dëser Petitioun wëll ech d'Chamber drop opmierksam maachen, datt d'Handlunge vun der Russescher Federatioun zanter dem Februar 2022 e massiven Broch vum internationale Recht duerstellen. De russesche Staat féiert en Ugrëffskrich géint d'Ukrain, deen vun den Vereenten Natiounen, dem Europäesche Geriichtshaff a villen aneren internationalen Organisatiounen als Verletzung vum Vëlkerrecht ugesi gëtt. Zousätzlech sinn Krichsverbriechen, Folter, systematesch Deportatioun vu Kanner an d'Zerstéierung vun der ukrainescher Kultur dokumentéiert. Duerch dës Handlungen entfernt sech Russland ëmmer méi wäit vun den Idealer, déi d'Grondlag fir e normalt, respektvollt a friddlecht Miteenaner an enger ziviliséierter Welt bilden. Dës Entwécklung stellt net nëmmen eng Gefor fir d'Ukrain duer, mee och fir d'Stabilitéit, d'Sécherheet an d'Wäerter, déi d'Europäesch Unioun an d'international Communautéit droen. Am Liicht vun dësen Entwécklungen a mam Respekt virun de lëtzebuergeschen a gemeinschaftlechen europäesche Wäerter, bieden ech d'Chamber: d'Präsenz an d'Aktivitéite vun der russescher Ambassade zu Lëtzebuerg ze iwwerpréiwen; d'Méiglechkeet ze erwägen, dës Ambassade temporär zouzemaachen oder hir diplomatesch Missioun ze suspendéieren, bis Russland de Krich géint d'Ukrain stoppt an international Recht an Entscheedunge respektéiert; e kloert Zeechen ze setzen, datt Lëtzebuerg Gewalt, Annexioun a systematesch Verstéiss géint Mënscherechter net akzeptéiert. Dës Ufro ass net géint d'russesch Bevëlkerung geriicht, mä géint déi aktuell staatlech Politik, déi d'Grondlage vum internationale Fridden a vum Rechtssystem ënnergrueft. Mat Respekt, Reiter Romain